ВІТАМІНЫ ДА ВАШАГА СТАЛА
Дырэктар філіяла “Цяплічны” П. Фаміноў, начальнік участка закрытага грунту І. Гузава, галоўны аграном В. Прохараў.
Прайшоў амаль год, калі Прэзідэнт Республікі Беларусь Аляксандр Лукашэнка падчас рабочага візіту ў Аршанскі раён наведваў філіял “Цяплічны” РУП “Віцебскэнерга”. Тады кіраўніком дзяржавы былі дадзены канкрэтныя даручэнні. Як вядзецца работа ў гэтым накірунку, чытачам нашай газеты сёння раскажа дырэктар камбіната Павел Фаміноў. На гэту пасаду Павел Мікалаевіч прызначаны толькі ў верасні мінулага года, але за гэты час на прадпрыемстве адбыліся прыемныя змены, назіраецца станоўчая дынаміка развіцця, але самае галоўнае – тут не толькі будуюць сур’ёзныя планы на перспектыву, але і ведаюць, як іх ператварыць у рэальнае жыццё.
– У сярэднім прадпрыемства вырабляе каля сямі тысяч тон агародніны ў год, – расказвае Павел Фаміноў. – Гэта дазваляе цалкам забяспечваць вітаміннай прадукцыяй жыхароў Оршы і Аршанскага раёна. Таксама ёсць у нас дзве аптовыя базы, сервавы ўчастак, шэсць фірменных магазінаў, 17 кіёскаў для продажу нашай прадукцыі, а таксама кафетэрый, які размешчаны ў магазіне “Пошук”, што знаходзіцца ў раёне “Раніца” ў Оршы.
У гэтым годзе пачалі мадэрнізацыю сховішчаў. У перспектыве яны будуць абсталяваны сістэмай падтрымкі мікраклімату і сучаснымі халадзільнымі камерамі. Неабходна нам пабудаваць і новыя энергазберагаючыя цяпліцы, дзе можна было б вырошчваць найноўшыя айчынныя гатункі гуркоў, таматаў, капусты, морквы і г.д. і атрымліваць у перспектыве багаты ўраджай гэтых культур. На мадэрнізаваных гектарах думаем заняцца вырошчваннем садавіны і кветак. А пакуль зарабляем грошы на набыццё тэхнікі для ўборкі і апрацоўкі буракоў і морквы. Ужо сёлета плануем “абкатаць” на практыцы вырошчванне гародніны па новых галандскіх тэхналогіях. Калі яны паспяхова прыжывуцца, мы зможам атрымліваць ураджай гуркоў ужо ў снежні, таматаў – у сакавіку-красавіку, а зялёных культур – на працягу ўсяго года.
Па словах Паўла Мікалаевіча, у бліжэйшай перспектыве чакаюцца змены і на кансервавым участку, дзе зараз перапрацоўваецца больш за 100 тон уласнай прадукцыі. Так, калі сёння тут займаюцца кансерваваннем і марынаваннем агародніны, вытворчасцю таматнага і бярозавага сокаў, то праз год-другі філіял “Цяплічны” значна пашырыць асартымент такой прадукцыі і будзе арыентаваны на вытворчасць прадукцыі ў новай шкляной тары “Еўра-твіст” вагой адзін кілаграм.
На маё пытанне, у чым сакрэт поспеху, дырэктар Павел Фаміноў з упэўненасцю адказвае: “У жаданні працаваць і рабіць сваю справу так, каб яна прыносіла асалоду не толькі табе, але і была на карысць людзям”.
Настасся ТУРОК.
Фота аўтара.
