На лецішчы Купалы ў Ляўках зладзілі свята паэзіі
Абласное свята паэзіі “Край мар маіх і думак светлых – мая Радзіма Беларусь”, прысвечанае 70-годдзю вызвалення рэспублікі ад нямецка-фашысцкіх захопнікаў, 20 чэрвеня сабрала на тэрыторыі Купалаўскага мемарыяльнага запаведніка “Ляўкі” сотні прыхільнікаў мастацкага слова. 
Удзельнікаў і гасцей чакала насычаная праграма. Падчас свята была закладзена капсула з пасланнем будучаму пакаленню, усталявана “Лава гасціннасці”. Працавалі творчыя пляцоўкі літаратурных аб’яднанняў Віцебскай вобласці, Аршанскай ЦБС, дамоў рамёстваў. Кожны змог адведаць стравы беларускай нацыянальнай кухні. Удзельнікамі канцэртнай праграмы, якая працягнула мерапрыемства, сталі творчыя калектывы не толькі Аршаншчыны, але і ўсёй вобласці. Якое ж свята паэзіі без вершаў? Іх са сцэны прачыталі самі аўтары – мастакі слова нашага краю і Віцебшчыны.
Марына СЯМАШКА.
Фота аўтара.
