Лён любіць паклон

у СВК “Роскі Сялец” падымаюць лён работнікі ўстаноў адукацыі

У рамках  месячніка  “Горад – вёсцы” працоўныя калектывы Оршы накіравалі сваіх прадстаўнікоў і тэхніку на льняныя палеткі Аршанскага, Дубровенскага і Талачынскага раёнаў.

Як паведамілі ў Аршанскім гарвыканкаме, працоўны дэсант гараджан аказвае дапамогу работнікам аграпрамысловага комплексу  з канца жніўня. На 8 верасня ў Аршанскім раёне на льне  было задзейнічана  больш за 400 прадстаўнікоў гарадскіх прадпрыемстваў,  арганізацый і навучальных устаноў, у тым ліку на палетках Арэхаўскага  льнозавода  працавалі 150 чалавек, а  на супрацьлеглым  канцы раёна, у Смальянах – 110. Найбольш шматлікімі з’яўляюцца  працоўныя атрады з ільнокамбіната – больш за сто чалавек, гарадскога аддзела адукацыі і ўстаноў аховы здароўя – па 70 чалавек з кожнай галіны, а таксама 40 прадстаўнікоў з розных службаў гарвыканкама. У гэты дзень Дубровенскаму льнозаводу аказвалі дапамогу 190, а коханаўскаму – 170 гараджан.

Пастаўленую  задачу – у сціслыя тэрміны сабраць з палёў вырашчаны ўраджай,  аршанцы  намераны выканаць аператыўна і якасна, тым больш, што надвор’е  спрыяе  палявым работам.

Ліна ГАТОЎСКАЯ