Зимний спортивный праздник для жителей всего района прошел в Устье
У зімовым раённым спартыўным свяце ў аграгарадку Вусце ўзялі удзел 17 каманд з колькасным складам у 315 чалавек. Арганізатарамі традыцыйнага мерапрыемства выступілі Аршанскі райвыканкам, аддзел па фізічнай культуры, спорту і турызму, аддзел культуры райвыканкама і раённы камітэт прафсаюзаў работнікаў АПК.
Як аказалася, самым распаўсюджаным і любімым відам спорту сярод жыхароў Аршанскага раёна з’яўляюцца лыжы. Уласныя здольнасці тут праяўлялі прадстаўнікі ўсіх узростаў. Адметна, што ў спартыўным свяце пераважную большасць склалі маладыя прыхільнікі здаровага ладу жыцця. У сваім уступным слове да прысутных перад пачаткам спаборніцтваў першы намеснік старшыні раённага выканаўчага камітэта, начальнік упраўлення сельскай гаспадаркі і харчавання выканкама Андрэй Канстанцінаў павіншаваў спартсменаў са святам, нагадаўшы пра высокія дасягненні ў спорце ўраджэнцаў Аршанскага раёна. Гэта сусветна вядомыя імёны выхаванцаў дзіцяча-спартыўнай школы Таццяны Шараковай, Наталлі Міхневіч, Аляксандра Кучынскага і іншых. Сёння кожны жыхар Аршанскага раёна пры жаданні можа рэалізаваць сябе ў розных відах спорту: на Аршаншчыне працуюць два фізкультурна-аздараўленчых комплексы, больш за 20 спартыўных залаў, 10 футбольных палёў, больш за 40 спартыўных пляцовак і г. д. Традыцыйнымі сталі і міжрэгіянальныя спаборніцтвы на базе Бабініцкага ФОКа інвалідаў-калясачнікаў. Не менш знакамітыя і юныя хакеісты з Зубава. Кожнае дасягненне спартсменаў – гэта чарговая старонка ў спартыўным летапісе раёна. Андрэй Вітальевіч пажадаў удзельнікам спаборніцтваў поспеху і ўдалых стартаў.
Лыжныя спаборніцтвы праводзіліся па пяці ўзроставых групах. Згодна з палажэннем аб правядзенні “Беларускай лыжні”, у гэтым відзе спорту прымалі ўдзел кіруючыя работнікі арганізацый, прадпрыемстваў, акцыянерных таварыстваў і навучальных устаноў Аршанскага раёна. Лыжныя гонкі для жанчын былі працягласцю 1,5 км, для мужчын – 3-1,5 км. Апошняя лічба для мужчын узростам ад 59 і больш гадоў. Барацьба за перамогу тут была вострай і напружанай. Кожная каманда старалася зарабіць як мага больш ачкоў, каб “выбіцца” ў лідэры. Вось прозвішчы тых, каму на лыжні сёлета ўсміхнулася ўдача. Жанчыны да 30 гадоў: Таццяна Кандрашова з птушкафабрыкі, Настасся Конышава са Смальянскага дзяржаўнага агракаледжа і Яна Бяляцкая з раённага аддзела адукацыі; жанчыны ва ўзросце 30-39 гадоў: Юля Плавінская з агракамбіната “Юбілейны” і Алена Шыбека з Высокскага ліцэя; ва ўзроставай катэгорыі 40-49 гадоў пераможцамі сталі: Мая Быкава з ДП “СГЦ “Задняпроўскі”, Людміла Арлова з раённага аддзела адукацыі і Таццяна Сліжова з ДАК (Смальяны); Таццяна Літвінава з ДПЛ (Высокае) заваявала перамогу сярод лыжніц у катэгорыі 50-59 гадоў. У мужчын таксама выйшлі наперад самыя вынослівыя і найбольш падрыхтаваныя фізічна. Гэта малады спецыяліст Павел Кірымаў з раённага аддзела адукацыі, Юрый Трыбушэўскі з райвыканкама і Павел Пашкоўскі з завода ЖБВ, катэгорыя да 30 гадоў.
Не менш напружанай была барацьба за лідэрства і сярод лыжнікаў ва ўзросце 30-39 гадоў. Тут хутчэй за ўсіх да фінішу прыйшлі Павел Есмуханаў (ДП “СГЦ “Задняпроўскі”), Уладзімір Мурашка – ААТ “Птушкафабрыка Аршанская” і Уладзімір Кузьмінаў з раа. Ва ўзроставай катэгорыі 40-49 гадоў перамогу заваявалі Вячаслаў Вадзяніцкі (ДП “СГЦ “Задняпроўскі”), Ігар Вайцяховіч – ААТ “Агракамбінат “Юбілейны” і Андрэй Куляеў з раённага выканаўчага камітэта. З добрага боку паказалі сябе таксама прадстаўнікі лыжнага спорту, катэгорыя 50-59 гадоў; Сяргей Шчэрба з раа, Васіль Зінковіч з СВК “Ларынаўка” і Аляксандр Валадзько з ААТ “Птушкафабрыка Аршанская”. Завяршыў эстафету “Беларуская лыжня-2011” прадстаўнік катэгорыі 60 і старэй Аляксандр Вавінскі, які паказаў найлепшы вынік прабегу.
Апрача лыжных эстафет, спартсмены змагаліся за прызавыя месцы ў хакеі з шайбай, міні-футболе на снезе, гіравым спорце і перацягванні каната. У гэтых відах спорту лідэрства размеркавалася наступным чынам. Сярод хакейных каманд на першым месцы аказаліся прадстаўнікі ААТ “Купалаўскі”, другое месца заваявалі хакеісты БелДРЭСа, а на трэцюю прыступку падняліся іх сапернікі з СЛК “Днепр”, што ў Копысі. Вельмі хацелі выйсці ў пераможцы футбалісты са Смальянскага ДАК, аднак перамога тут дасталася самым падрыхтаваным камандам: ААТ “Юбілейны”, ААТ “Экамол” і ДП “С/х э/б “Вусце”. Дарэчы, прадстаўнікі працоўнага калектыву ААТ “Юбілейны” паказалі высокія вынікі ў пяці з шасці відаў спаборніцтва. У перацягванні каната мацнейшымі былі прызнаны – ДПЛ (Высокае), другімі – ААТ “Юбілейны” і трэцімі – сілачы з УСГП “Смальяны”. Памераліся сілай і гіравікі. Першае месца адстаяла каманда ДПЛ (Высокае), другое – ДП “СГЦ “Задняпроўскі” і трэцяе – ААТ “Юбілейны”. А ў агульнакамандным заліку першынство размеркавалася наступным чынам: ДПЛ (Высокае), ААТ “Юбілейны” і ДП “СГЦ “Задняпроўскі”. Узнагароджанне каманд-пераможцаў кубкамі, Ганаровымі граматамі і прызамі забяспечыў аддзел па фізкультуры, спорту і турызму Аршанскага райвыканкама і РК прафсаюзаў работнікаў АПК.
Спартыўныя спаборніцтвы суправаджаліся цікавай і разнастайнай культурнай праграмай, а работнікі Аршанскага райпа частавалі ўдзельнікаў свята разнастайнымі прысмакамі. Найбольш запатрабаванымі ў суботні ветраны дзень былі гарачая гарбата і кава.
Свята ў аграгарадку Вусце вызначыла самых лепшых спартсменаў, тых, хто надае заняткам спортам вялікую ўвагу, шмат часу займаецца рознымі яго відамі. Спадзявацца на перамогу аматарам цыгарэт і піва не было ніякага шанцу. Тым не менш, наперадзе цэлы год, каб падрыхтавацца да наступнага спартыўнага свята, да чарговай “Беларускай лыжні”. Спартсмены Аршанскага раёна, вас чакаюць новыя старты!
Ліна ГАТОЎСКАЯ.