Пытанне Прэзідэнту
У рэспубліканскай акцыі “Пытанне Прэзідэнту”, якая праходзіла вясной бягучага года, прымала ўдзел маладое пакаленне Беларусі. “Аршанская газета” на той момант расказвала чытачам пра рабят з Вусценскай школы, якія актыўна ўключыліся ў гэтае мерапрыемства. І вось сёння вучні школы – зноў героі газетнай публікацыі.
У выніку акцыі шасцёра вучняў школы атрымалі пісьмы ад Прэзідэнта, а Кастусь Ляпуноў быў запрошаны ў Мінск на сустрэчу з кіраўніком дзяржавы. Да таго ж, на днях па цэнтральным тэлебачанні фотасюжэт з Косцем бачыла ўся наша вялікая краіна, у тым ліку і школьнікі УА “Вусценскі ДВПК д/с-СШ”.
Як стала вядома, пытанні Прэзідэнту абдумвалі ўсім вучнёўска-педагагічным калектывам. У выніку атрымаўся даволі грунтоўны, лаканічны ліст, большасць пытанняў якога тычылася жыцця сельскай дзетвары і моладзі. Вось, што гаворыць з гэтай нагоды адзін з герояў падзеі.
Кастусь Ляпуноў:
– На сучасны момант я з’яўляюся вучнем Лужаснянскай школы-інтэрната. У будучым бачу сябе футбалістам. Я ганаруся, што Прэзідэнт – мой зямляк, які шмат увагі надае развіццю фізічнай культуры і спорту ў краіне, сам актыўна -ўдзельнічае ў спартыўных мерапрыемствах. Але мяне Прэзідэнт цікавіць не толькі як палітычны дзеяч. Мне хочацца ведаць, якім было яго жыццё ў юнацкія гады. Мяркую, што гэта ў аднолькавай ступені карысна будзе ведаць- усім маім равеснікам. Сваё пытанне я сфармуляваў так: “Якое значэнне для Вас мела ўступленне ў рады УЛКСМ?”.
Сярод пытанняў самага рознага накірунку, адрасаваных вусценскімі школьнікамі Аляксандру Рыгоравічу Лукашэнку, можна адзначыць зварот дзевяцікласніка Аляксея Коршыка: “Ці з’явяцца дадатковыя льготы для шматдзетных сем’яў?”, дзесяцікласніцы Алены Рыка – “Ці ведаеце Вы пра існаванне гарадскога пасёлка Вусце, ці даводзілася тут бываць? Калі так, то што запомнілася пра гэты населены пункт?”, адзінаццацікласніка Рамана Пуцкалёва – “Ці будуць у бліжэйшы час унесены змены ў цэнтралізаванае тэсціраванне?”. Двое з адзначаных удзельнікаў акцыі, выпускнікі школы Ігар Семянкоў і Карына Сулейманава сёння ўжо студэнты ВНУ: БДУ і Магілёўскага педуніверсітэта. Ігара (нагадаю, акцыя праходзіла пад час падрыхтоўкі да выпускных іспытаў) турбавала пытанне: “Якімі льготамі можа карыстацца абітурыент з сельскай мясцовасці пры паступленні ў ВНУ?”, а Карыну: “Ці зменіцца эканамічная сітуацыя пасёлка Балбасава і Аршанскага раёна ў цэлым у выніку супрацоўніцтва Аршанскага авіярамонтнага завода з прадстаўнікамі кітайскай прамысловасці?”.
У адпаведнасці са склаўшайся традыцыяй, дыялог Прэзідэнта краіны з маладым пакаленнем трансліраваўся па тэле- і радыёвяшчанні, быў шырока асветлены ў друкаваных СМІ. Таму на самыя цікавыя і слушныя пытанні адказы былі атрыманы непасрэдна праз прамы эфір.
У Вусценскай школе зараз актыўна абмяркоўваюць гэтую падзею, тым больш, што сакратар школьнай пярвічнай арганізацыі БРСМ Вольга Яскевіч і намеснік дырэктара па выхаваўчай рабоце Лідзія Леанідаўна Лазарава прымалі ў падрыхтоўцы і правядзенні акцыі самы непасрэдны ўдзел. Лідзія Леанідаўна – ураджэнка Вусця, выпускніца школы, усім сэрцам прыкіпела да роднай альма-матэр. Яе апантанасць школьнымі справамі не што іншае, як 37-гадовы педагагічны вопыт. Сваю любоў да малой радзімы педагог са шчырым сэрцам ахвотна перадае з пакалення ў пакаленне юным вусцянцам, што кожны год пераступаюць парог школы. Дзякуючы кіпучай энергіі Лідзіі Леанідаўны школьнікі з Вусця штогод атрымліваюць адзнакі на рознага роду конкурсах раённага і абласнога маштабаў. У памочніках у Лідзіі -Леанідаўны маладая калега, сакратар пярвічнай арганізацыі БРСМ Вольга Яскевіч. У школе малады педагог з 2003 года. Не зважаючы на тое, што нарадзілася і вырасла яна ў горадзе, Вольга камфортна адчувае сябе ў сельскай школе і ў сяброўскай атмасферы калектыву. Дзякуючы няўрымслівасці сваіх педагогаў вучні школы заўсёды займаюць актыўную жыццёвую пазіцыю. Літаральна ўчора яны завяршылі збор сродкаў па акцыі “Дзеці – дзецям-інвалідам” для рэспубліканскага дзіцячага фонду, а сёння ад душы, як толькі гэта ўмеюць рабіць дзеці, радуюцца пагожым дням восеньскіх канікул. У асяродку школы створаны ўсе неабходныя ўмовы для вучобы і пазашкольнай работы вучнёўскага калектыву. Паважлівыя адносіны дарослых да рабячых радасцей і праблем спрыяюць таму, што выпускнікі школы застаюцца жыць і працаваць у родным Вусці.
Згодна са школьным летапісам, трэцяя частка выпускнікоў школы традыцыйна ўладкоўваецца на працу ў мясцовую гаспадарку. Былыя выпускнікі складаюць і палову педагагічнага калектыву школы. Сёння рашэнне вярнуцца ў сцены школы прыняла Карына Сулейманава. У будучым мяркуе прыйсці сюды пасля вну, каб прадоўжыць справу сямейнай дынастыі і цяперашняя школьніца Алена Рыка…
У падлеткаў – наперадзе вялікае, цікавае на падзеі жыццё з мірнай будучыняй. І кожны з іх з гордасцю за сваю малую радзіму гаворыць: “Жыву ў Беларусі і тым ганаруся!”
Ліна ГАТОЎСКАЯ