Падворак сям’і Кудраўцавых
Вяскоўцам Валерыю і Наталлі Кудраўцавым на дваіх 60 гадоў. Аднак, нягледзячы на маладосць (як ужо зразумелі чытачы, кожнаму з іх па трыццаць), гэтая маладая сям’я канкрэтна пазначыла свае жыццёвыя арыенціры.
Першы сур’ёзны крок – гэта рашэнне жыць у сельскай мясцовасці. Гараджанка Наталля да замужжа не вельмі ўяўляла сабе лёс сяльчанкі, але вынікі некалькіх гадоў жыцця ў вёсцы Ніжняя Веравойша сведчаць пра тое, што з абавязкамі гаспадыні, маці і жонкі яна паспяхова спраўляецца. Валерый і Наталля ідуць разам па жыцці ні многа, ні мала – 10 гадоў. За гэты час яны добраўпарадкавалі дзедаўскую сядзібу, абклаўшы цэглай дом і ўпрыгожыўшы агародчык, нарадзілі сына і дачушку і ўзялі на выхаванне з інтэрната дзяўчынку, яна жыве тут ужо два гады. За адзін толькі гэты ўчынак Кудраўцавы заслугоўваюць павагі да сябе, бо сіроцкая доля, нават пры ўсеагульным клопаце дзяржавы, – незайздросная.
Кожны з нас добра ведае, што жыццё ў вёсцы абавязвае трымаць нейкую жыўнасць. Падворак Кудраўцавых можна лічыць моцнай гаспадаркай. Тут каровы, свінні, куры, невялікае трусінае пагалоўе. Усім вядома: каб дагледзець і накарміць жывёліну і птушку, трэба клапаціцца аб іх з ранку да вечара. Валерый і Наталля гэтага не баяцца і свае абавязкі выконваюць звыкла, спрытна спраўляючыся з работай. Дзеці, хоць і малыя, тым не менш, таксама ахвотна дапамагаюць дарослым. Хапае часу ім і пагуляць: узрост восем, сем і дванаццаць самы, што ні на ёсць, бестурботны, ды і бацькі не забываюц-ца на дзіцячыя забавы. Пасля працоўнага дня сям’я збіраецца, каб разам адпачыць і цікава правесці вольны час. Адметна, што маладыя гаспадары з’яўляюцца пастаяннымі падпісчыкамі “АГ”, з якой яны даведваюцца пра навіны Аршанскага рэгіёна. Безумоўна, такі маральны мікраклімат абавязкова паспрыяе выхаванню ў дзяцей паважлівых адносін да матулі з бацькам, разумення таго, што праца дапамагае дасягнуць пастаўленай мэты і стаць матэрыяльна незалежным чалавекам.
Л. ГАТОЎСКАЯ